एक दाण बास्याब अन बीरबल एक जगाँ गुमबा ने ग्या हा। बास्याब बीरबल ने एक बात की के बता बीरबल अणी दुन्याँ में सबऊँ भाली कई चीज हे। बीरबल जट क्यो जहांपनाह अणी दुन्यां में सबूँ वालो जीव है। बास्याब क्यो के वताणों पड़े के जीव कस्यान वालो है। थोड़ा’क दनां केड़े बीरबल एक वान्दरी अन वणिको बच्यो लेन दरबार में आयो अन दरबार में एक तळाव हो वणी तळाव ने खाली करायो अन वणी में एक वाळ्ड़ो रोप्यो अन वणी खाली तळाव में वणी वान्दरा अन वणिका बच्या ने छोड दिदो हो। अटने तळाव ने पाचो धीरे-धीरे भरवा लागा। वान्दरो ज्यूँ पाणी भड़े आयो ज्यूँ बच्या ने छाती के लपा’न वणी वाळ्डा पे छड ग्यो हो, धीरे-धीरे वान्दरो ज्यूँ पाणी भड़े आवे ज्यूँ वो बच्या ने ले’न वणी वाळ्डा पे छडे। बास्याब क्यो के बीरबल यो तो अणीका बच्या का जीव ने वत्तो छारयो। वणी क्यो के कोनी अबाणूँ देकता रेवो। पाणी वान्दरा के छाती अन पछे गळा तक आयो अन वो वणी वाळ्डा के ठेट ऊपरे परोग्यो हो। ओरी पाणी आयो तो वो वणीका बच्या ने वणी वाळ्डा के ऊपरे मेल’न ऊपरे पग देन बच्या के ऊपरे ऊबो वेग्यो हो। बीरबल क्यो के देको हुकुम अबे यो वान्दरो खुद का जीव ने वंचावा के वाते यो अणीका बच्या ने बी नी छोड्यो। अणी वाते सब जीवां ने वणांको जीव वालो लागे।
प्रसन-1. बास्याब बीरबल ने कई वात की ही?
2. बीरबल बास्याब ने कई चीज सबऊँ वाली बत’ई अन वो दरबार में कई चीज लेन आयो हो?
3. वान्दरा ने कटे लेजा’न छोड्यो अन तळाव में पाणी छोड्यो तो वान्दरो कई किदो हो अन पाणी गळा तक आयो तो भान्दरो कई किदो हो?
अणी केणी मूँ भणबा वाळा बाळकाँ ने कई अकल मले लिको—