एक दाण बास्या अकबर के दरबार में सब जणा बेटा हा। वीं दन बीरबल ने आयो हो, बास्या ने सब जणा क्यो हो के थाँका हदई बीरबल की मेमा घणी करो वींमे अस्यो कई हे अन वो जस्यो काम कर नाके वो काम में बी कर नाकाँ थाँका माने एक बी मोको ने देवो। बास्याब ने बीरबल की बूरई हव ने लागी ही। वाँ क्यो के थाँकी बी मेमा करबा लागजाऊँ मारो एक सवाल को जबाब देणो पड़े। पण वीं सवाल को जबाब हाँचो देणो ज्यो हाँचो जबाब ने देई वींने मोत की सजा मेली। वाँ क्यो के सवाल कई हे। बास्याब क्यो ईं दुन्याँ में सबऊँ मोटी चीज कई हे। दरबारी क्यो के माने थोड़ाक दना की मोलत देणी पड़े। वाँने एक हपता की मोलत दे दिदी ही। अबे वे च्यारी जणा बान्ने आया अन सल्ला करबा लागा। एक क्यो के सबऊँ मोटो ईं दुन्याँ में अल्ला हे। एक क्यो के यो बी कोइने अस्यान करताँ-करताँ हात दन पूरा वेग्या हा।वाँने कई जबाब ने मल्यो हो वे बीरबल नके ग्या अन बीरबल ने सब बात बता नाकी ही। बीरबल क्यो के सवाल को जबाब तो मूँ बता नाकूँ पण मारी एक सरत हे।वाँ क्यो के थारी सब सरत माना। वीं क्यो के मने थाँ दो जणा माचा पे बेटाणन तोकन लेजाणो पड़े, एक जणो मारो हुक्को पकड़े अन एक जणा ने मारी पगरक्याँ पकड़न चालणो पड़े। वाँने एक दाण तो रीस अई ही पण काम वाँके हो, वे च्यारी बीरबल की बात मान लिदी ही। दो जणा बीरबल का माचा ने माता पे तोक्यो एक जणो हुक्को अन दूजो जणो पगरक्याँ पकड़ी। गेला में सब जणा देक्यो वाँने दाँत घणा आया। दरबार में बीरबल ने अस्यान देकन किंकेई हमज में ने आयो हो। पण बीरबल क्यो हजूर ईं संसार में सबऊँ मोटी गरज हे, ज्यो मनक ने कई बी काम करबा के बाते मोताज कर नाके। बास्या बीरबल का जबाबऊँ घणा राजी व्या हा अन क्यो ईं बाते मूँ बीरबल की मेमा करूँ।
प्रसन-1. बास्या ने सब दरबारी बीरबल के बाते कई क्यो हो?
2. वे मंतरी सवाल का जबाब बाते कटे ग्या हा, अन बीरबल वाँने कणी सरत के बाते क्यो हो?
3. बीरबल वाँने लेन दरबार में ग्यो वीं दाण वीं बास्या ने कई बात की ही?
ईं केणीऊँ भणबा वाळा मनकाँ ने कई अकल मले लिको —