एक दाण एक नगर में एक सेटजी रेता हा। वाँके च्यार बेटा हा। च्यारी बेटा पन्या तका हा। एक दाण सेटजी वाँका च्यारी छोरा की भूवाँ ने न्यारा-न्यारा सवाल पूँछ्या हा। वाँ क्यो के बीन्दणी बताओ, कस्या दन हऊ रेवे। मोटी भू क्यो के उन्दाळा का तो दूजी भू क्यो के चोमासा का तीजी भू क्यो के हिंयाळा का दन बताया। चोती भू क्यो के बापू हऊ दन वे रेवे ज्यो होरा नीकळे। ईं जबाब मूँ सेटजी राजी व्या हा। 
एक दाण कणी बात मूँ वाँने उटाका राजा देस निकाळो दे दीदो हो। नोकराँ के हामे नानकी भू ओण्यो तको आटो लेन अई अन क्यो के मूँ हारई जणाऊँ फोरी भू हूँ, ज्यो हारई तो रोट्याँ खा लीदी अन मारे रोट्याँ खाणी हे। थाँ केवो तो मूँ रोट्याँ करन खालूँ। ने केवो तो आटा ने हण्डे ले लूँ जो गेला में रोट्याँ करन खा लेऊँ। नोकर वींने वो आटो ले जाबा की के दीदो हो। सेटजी को हारो परवार नीकळग्यो हो। गेला में वीं फोरी भू वाँने रोट्याँ करन खवई अन वीं आटा में वाँ एक होना की मोर गुसाड़न लई ही। वींका धणी ने क्यो के ईं होना की मोर ने गेणे मेल दो अन आपणे सामान लेन आवो। वाँ रिप्या मूँ सेटजी उटे बोपार चलायो, थोड़ाक दना में तो सेटजी नंगर पती सेटजी बणग्या हा। राजा ने ईं बात को ध्यान पड़्यो, तो वे खुद उटे ग्या अन रात में वाँके घर के बान्‍ने खड़की के नीचे उबा वेन सेटजी की बाताँ हूणबा लागा। वीं दाण सेटजी को फोरो बेटो वींकी भू ने केरयो हो, के जा मारा बाते एक पान लेन आ। लुगई क्यो के अतरी रात में पान खाबा की या कई आदत हे। घर में चूनो बी कुईने। धणी क्यो के तो कई व्यो मारा कान्दड़ा की बाली मूँ एक मोती निकाळ ले अन पान में नाकन लिया। राजा या बात हुणन अचम्बा में पड़ग्या हा। दूजे दन राजा वीं सेट ने बलायो। राजा सेट ने क्यो के या बता के आपणा मूँ मोटो कूण हे, वीं क्यो ‘थाँका’ राजा ने मान्या वाँ क्यो के ईं बात ने मने काले हूदी हमजान केणो छावे। सेटजी बी दूजे दन जबाब देबा की क्यो। वीं वींका फोरा बेटा की भू ने जान क्यो के मने राजा आज अस्यी बात की। ईं बात को जबाब काले देणो हे, अबे मूँ कई करूँ। वीं बेटा की भू क्यो के बापू राजा ने कीज्यो के आपकी बात को जबाब मारे बेटा की भू देई। पण ईंके बाते रनीवास में मनकाँ ने बलावो अन पालकी खन्दावो। राजा बी अस्यो कीदो हो। राजा वींने क्यो के या बता के थारा होराजी मोटा हे के मूँ मोटो हूँ। सेटजी की भू क्यो के मोटा तो थाँ हो। माँ कस्यान मोटा वे सकाँ। थाँके जस्या मोटा मनक ईज मारा होराजी को धन ने ले लीदो हो। माने सब जणा ने देस नीकाळो दे सको हो। अन माका पाचा होरा वे जावाँ तो थाँकाणी माने जेळ में राक सको हो। राजा क्यो के मोटो वो नी वे सके कई जो मोती ने बाळन वींकी बानी मूँ पान खावे। वीं सेट की भू क्यो के ये तो टेम-टेम का मोल हे। माका तो दन ने होरो नीकालबा की कराँ। माका बाते तो हाराई दन एक हरीका हे। सेट की भू की बात हूणन राजा की आँक्याँ खुलगी ही। वाँ वीं सेट को धन पाचो दे दीदो हो अन वींने नगर में आदरभावऊँ पाचो लेन आया हा।
प्रसन-1. सेटजी वाँकी बेटा की भूवाँ ने कई सवाल पूँछ्या हा?
2. राजा वाँ सेटजी ने देस निकाळो दे दीदो हो तो वीं फोरा बेटा की भू हण्डे कई लीदो हो?
3. राजा रात में सेटजी की बात हुणन दरबार में बुलान कई क्यो हो?
ईं केणीऊँ भणबा वाळा मनकाँ ने कई अकल मले लिको —