भेरूँजी बावजी अस्या रे अड़ीला मारी सूनी ओ सेजाँ लूटी, अन्दाता ओ सूनी॥टेर॥
हार तोड़ मान्दळिया तोड़्या तोड़ी मारी तुळछाँ री माळा, अन्दाता ओ तोड़ी।
ढोल नंगारा बाजे ओ नोबताँ बाँक्यो ने सेहनई, अन्दाता बाँक्यो ने॥
भेरूँजी बावजी अस्या रे अड़ीला मारी॥
खरमळ-2 बाजे ओ घूघरा बाजे साँकळ बाजे भारी, अन्दाता ओ साँकळ॥
भेरूँजी बावजी अस्या रे अड़ीला मारी॥
भूत-पलिताँ का तोड़े ओ न्यावटा डाकणियाँ दरपावे, भेरूँजी डाकणिया॥
भेरूँजी बावजी अस्या रे अड़ीला मारी॥
बाँजड़िया ने बाळक देवे पालणिया बन्दावे, अन्दाता पालणिया॥
भेरूँजी बावजी अस्या रे अड़ीला मारी॥
मरवो तोड़ मोगरियाँ ओ तोड़ी, तोड़ी मारी तुळछाँ की क्यारी, अन्दाता तोड़ी॥
भेरूँजी बावजी अस्या रे अड़ीला मारी॥