तर्ज– सतगरू माँ सूँ मिलता जाज्यो जी…
ओ झालर संख नंगारा बाजे जी, उपरमाळ का मंगरा माही जोगण गाजे जी ॥
तुँही हे जगदम्ब ज्वाळा, उमा, रमा, ब्रह्माणी,
तुँही हे धनोप सीतळा, महिमा वेद बखाणी,
थारी जोत जग में सवाई जी । उपरमाळ॥1॥
तुँही हे चावण्ड चरताळी, सकळ आद भवानी,
तुँही हे काळीका किल्ले वाळी, तुँही जाँतळा राणी,
महिमा वेद सास्तर सब गावे जी । उपरमाळ॥2॥
तुँही आवरा भरका चण्डी, तुँही एळवा राणी,
तुँही उंटाळा भादू चण्डी, रावण वंस खपाणी,
सगती आप रूप बिराजे जी । उपरमाळ॥3॥
तुँही लाला फूलाँ मईयाँ, दरोपदी नार कहाई,
तुँही हेमंत बणी ज्वाळा, धरम धजा फेराई,
कानुड़ो गुण जस थारो गावे जी । उपरमाळ॥4॥